Fundación
CARMEN PASCUAL

el color la palabra del alma las manos el cuerpo que la palabra exhuma del vientre del tiempo el temblor que te cuenta flor que alimenta eres del viento la sed que ilumina al nacido eres Carmen Pascual, de lo aún por vivir, el rostro del corazón

Correspondencia. Para acompañar a Carmen. Sabía de tu poder y de tu apariencia frágil, sé de tu espíritu libre rebosante de amor. Libre nos arrastras hacia ti ofreciéndonos espacios de luz y de color. Registros intensos de la calma de la fuerza de la música y de todas las caricias. Límites cromáticos y difusos que redimen y nos ofrecen un tiempo de sosiego que conmueve. Trazos que desvelan los secretos del azar. Escritura universal al encuentro de la esencia inagotable. En tu mirada reconozco la lírica, la ternura la verdad y el alma de las cosas.

I El Tornu, el tiempu. Eri Carmin: la calli Lancha, el canchu grandi "loh Perali", la casa de tía Ohtavia, el rincón tan abrigau "del Rullinu" y el recuerdu de tu casa (la lumbri, loh cacharru…). ¡La fuerza de una raza! Lo´siju rehpingaban pol´la calli, el mariu bregaba con lah vaca; y tú ¡ay jamía! danzandu pa toa parti cuandu to´el mundu te llamaba. Con un cantaru en lah manu te ehcabullia con gana, to loh día un ratinu, con el toli toli pa la plaza; el agua de la fuenti se reía ca´vé que te salpicaba. E´nella loh noviu, el domingo, solu con mirarsi se besaban. Loh muchachu jugaban al aru, bebían del cañu a barba, y ehbruzau contra el pilón se sateaban toa la panza. ¡Menua polvarera rebullían con la comba lah muchacha! tenían de tantu brincá bien desembuelta lah pata. En esa entremedia, en la tahona, el pan blancu se dehpachaba, y en el puehtu de "tíu Cahcali" loh muchachu sa´remolinaban.

II Ehtaba el armariu abiertu, la muda sobri la cama, el peini en la repisa, el agua clara en la palancana... Mientra sonaba el ehquilón lah vecina s´avilanaban. Agarrá del bracileti comu si fueran hermana, caminu la iglesia, de reoju se ponian anguna falta. En el latriu, casi tó hombri, aguardaban de caraba; enreau en cabezoná que loh duraba toa la semana. III En cuanti el cura daba rienda, ca unu acudia a la su rutina. Siguiendu la regaera ehcapau se llegaba a "la Plazolilla". Pa en cá tíu Rupertu, angunu hombri acudian deprisa. Lah mujeri, dihtraia, ajorraban de la curva "la Blanquina", se lah veia salí del pueblu chacandu, po´rel lagá "la Ermita". IV ¡Ay de´su trazu de colori que´nel corazón sa´agitan! ¡Comu se dihtinguin loh añu, comu se´apareci la vida! ¡Ay Carmin, vergé del valli, nota de música sencilla! ¡Soniu del campu, retumbá de ehquila! ¡Ay liriu blancu plantá en la tu silla! Melodia de pianu al caló de una camilla. ¡Ay ojuh grandi, comu platu, que llaman cuandu miran con una risina temblona, alegri y crihtalina! V Cuandu acudi el pensaeru a la cabeza en lah hora larga, y en lah nochi casi ohcura dondi el animu enseguia s´aplana: vuela furtivu y disimulau el besu de tu hiju pol´la eshpalda; comu una alegri mariposa: profunda, bonita... en calma. ¡Cuánta cosa s´aprecian con la mirá del alma! Yo te veu, sin mirarti, comu se suelin vé a lah hada. Comu se sienti a lah musa cuandu juntah se agarran y cantan. Comu besa la cabrina al su chivinu, sin palabra. Comu habla el campu al campesinu ca mañana. Comu sueñan loh amori que de verdá se aman. Comu piensa la conciencia de la genti buena: esa, ta´numana. Comu latin loh deseu dende el fondu lah entraña. Comu una tarrafera de fuhca que al prontu se ehparrama, y lo poni to perdiu, y patajarriba, peru con mucha gracia. VI S´aprecian en la tu pintura quijoti, batalla y torniegu. Campesinu en la briega baju el grí del cielu ehtercolandu la tierra, tempranu, pal´su suhtentu. Tierra grí baju el arau, primitivu y vieju. Nubi grisi, casi negra, po´rel lau "el Chorreru". Casa fría, rejilona, en pemunbra, en silenciu; pol´la rendija del tejau la lú del rayu, la vó del truenu atormentandu la tu cabeza con el soniu del miedu. Veu en el verdi, la ehperanza de un añu tranquilu y guenu. El valli abancalau dende el ríu a la sierra, con loh su pueblu. La yerba verdi, recién tumbá, ehtendía en el suelu; y veu al segaó ca ihtanti, dehconfiau, mirandu de reoju al cielu. Verdi la arbolea bien tratá. Lah angarilla de loh guertu. La risotá de lah mujeri con loh ehquirmu en el cehtu. El tragu vinu de loh hombri co´nel su corazón contentu. La lú serena del día en el azul brillanti del cielu, recohtau entre loh canchu pa echarsi un buen sueñu. El agua clara y azul del ríu cuandu va profundu, casi quietu, asurcandu la jundoná del valli dende haci muchu tiempu comu una regaera mu grandi que a zachá s´abiertu. Blanca sa´precian saltandu toa lah garganta del pueblu. Barba blanca, dehcuidá, pelu blancu: loh aguelu. ¡Blanca dulzura en lo soju y e´nel corazón rehpetu! Van doh nubi blanca aparecia a un muñecu, dandu trompiconi blancu pa que la su figura adivinemu. Quietinu, callau, blancu loh muchachinu guenu. Co´nel su traji blancu, y prendiu el blancu velu, veu a la novia blanca dandu el su te quieru. Blanca lah flori del valli que relumbran comu ehpeju, que lucin igualitu que candili al florecé loh cerezu. VII Deja en la memoria Carmin colori pal recuerdu, lah raya y loh trazu que le bullían e´nel su pechu. ¡El Tornu, Carmin: pintura y versu!